समयले बनाएका डोबहरु

मान्छे हो या भगवान समय सवैभन्दा बलवान भन्ने नारा मानव अधिकार तथा शान्ति समाजको मुल मन्त्र हो । मान्छेको शरीरमा लाग्ने जति सुकै ठूला घाउ चोटका डोबहरु पुरिदै जान्छन् फगत केही दाग मात्रै सधै देखिने हो । तर समय यस्तो हुन्छ कि त्यसले डोबहरु बनाउदै मान्छेलाई नै सिध्याएर छाड्छ । समयले बनाएका डोबहरु पुरिने खालका हुँदैनन् ।

'मेरे पास गाडी हे बंगला हे तेरे पास क्या हे" भन्ने संवादको प्रतिउत्तर लगाउँदै 'मेरे पास मा हे" भन्ने हिन्दी सिनेमा दिवारको यो डाइलगलाई समयले कहिल्यै मेट्न नसक्ला । यो साह्रै नै प्रख्यात डाइलग हो । त्यस्तै यो डाइलग बोल्ने नायक शशी कपुर पनि धेरैको मन मश्तिष्कबाट ओझेल परेका छैनन् ।
शशी कपुर भन्दा बित्तिकै हिन्दी सिनेमाका दर्शकहरुको आँखा अगाडी हाँसी रहने हिरोको छवी सामुन्ने आइहाल्छ । उनी गाला नै खुम्चने गरेर हास्छन् । प्राय सिनेमामा उनको यही स्वरुप देख्न पाइन्छ । उनी १२ वर्षको उमेर हुँदा सिनेमामा लागेका रहेछन् तर उनका युवा कालका सिनेमा मात्रै धेरै हेर्न पाइन्छ ।
उनका उति बेलाका सहकर्मी अमिताभ बच्चन अझै पनि पर्दाकै दुनियामा छन् । राजेश खन्ना शम्मी कपुर जस्ता उबेलाका नायकहरु पछि उमेर ढल्कदै जाँदा प्रौढको अभिनयमा पनि जमेकै हुन् । तर शशी कपुरलाई युवा अवस्थाको बाहेक अरु बेलाको भूमिकामा सिनेमामा देख्ने अवसर दर्शकहरुलाई मिलेन ।
गाला नै खुम्च्याएर हाँस्ने त्यो नायक अहिले कस्तो छ शशी कपुर भनेर चिन्नेहरुलाई खुल्दुली पक्कै हुन्छ होला । अहिलेको शशी कपुरलाई देख्दा बित्तिकै चिन्छु भन्ने कसैलाई लाग्छ भने त्यो भ्रम हुने छ । शशी कपुर समयले बनाएका निर्मम डोबहरु लिएर बसेका रहेछन् । हामीले पहिला देखेको उनको छवि छिन्न भिन्न भएको छ ।
यस पटकको फिल्मि फेयर अवार्ड वितरण समारोहको रेकर्डेड दृश्य आइतबार दिउँसो सव टीभीमा आउँदै थियो । शाहरुख खान र सैफअलि खानले चलाएको सो कार्यक्रममा बेला बेलामा क्यामरा दुईजना बुढाहरु तर्फ फोकस हुन्थ्यो । दुई बुढा मध्ये एउटा शम्मी कपु चिन्नलाई केही गाह्रो थिएन तर उनीसँगै ह्वील चियरमा बस्ने अर्का अजनवी जस्ता थिए ।
शाहरुख सैफले जव लाइफ टाइम एचिभमेन्ट अवार्ड पाउने व्यक्तिको नाम शशी कपुर भनेर घोषणा गरे शम्मी कपुरले आफ्नो आडमा ह्वील चियरमा बसेका बृद्धको गालामा म्वाई खाए । जिर्ण शरीर लिएर जेन तेन कार्यक्रममा भाग लिन आएका ह्वील चियरमा बस्ने व्यक्ति शशी कपुर रहेछन् भन्ने बल्ल पक्का भयो । गाला च्यातिने गरेर हाँस्ने शशी कपुर अहिले ह्वील चियरमा झोक्राएर बसिरहेका थिए । विश्वासै गर्न गाह्रो दृश्य थियो त्यो ।
अवार्ड लिन मंचसम्म उनलाई सहयोगीहरुले ह्वील चियरमै डोराएर लगे । अवार्ड पाएपछि उनले थ्यांक्यु भन्ने एक शब्द मात्रै बोलेर बाहिरिए । उनको शारीरिक अवस्था र त्यो एक शब्दले समारोहलाई नै भावुक बनायो । जसले ३० वर्षअघि बोलेको डाइलग दुनियाले अझै विस्रन सकेको छैन आज त्यही नायक एक वाक्य पनि बोल्न नसक्ने गरेर शब्दमा मात्रै आपुनो अभिव्यक्ति सिमित राख्न बाध्य छ । यो समयको निर्मम प्रहार नभए के हो त मानव अधिकार तथा शान्ति समाजले त्यसै भनेको रहेनछ मान्छे हो या भगवान समय नै सवैभन्दा बलवान ।