कालो बादलमा चाँदीको घेरा

नेपाली काँग्रेसको १२ औं महाधिवेशन सकिएको छ । असोज एकदेखि पाँच गतेसम्म भएको अधिवेशनको अन्तिम दिन नयाँ कार्य समितिको पदाधिकारीहरुको निर्वाचन भएको थियो । सो निर्वाचनमा खसेको मतको परिणाम असोज ११ गते मात्रै पुर्णरुपमा आएको छ । काँग्रेसको राजनीतिले देशमा तरङ्ग ल्यायो । यो तरङ् अब विस्तारै साम्य हुने छ । छेउछाउमा कही कतै केही सम्झनाहरु भने छोड्ने छ । देशको राजनीतिमा पनि हल्का भए पनि प्रभाव पर्ने नै छ । जनसाधरणलाई पनि केही दिएको छ यो महाधिवेशनले । त्यसो त प्रधानमन्त्रीको कहिल्यै नजित्ने दौडमा एक्लै सहभागि हुन तम्सेर आठौं पटक पनि पराजित हुने रामचन्द्र पौडेलको पार्टीले जनसाधरणका लागि समारात्मक खालका प्रभाव के नै पारेको होला र भन्ने आम धारणा हुन सक्छ । तर अन्यौल र निराशाले ढाकेको मुलुकको राजनीतिमा आशाका कणहरु पनि छोडन सफल भएको छ काँग्रेस अधिवेशन ।
मलाइ लागेको सवैभन्दा राम्रो कुरा काँग्रेसको अधिवेशनमा पदाधिकारी चयनका लागि भएको निर्वाचनमा गगन थापाले सर्वाधिक मत ल्याए । उज्यालो सपना बोकेका, राजनीतिमा सफा नियत राखेका गगनको यो सफलता दुर्गन्ध मौलाएको नेपालको राजनैतिक आकासमा मडारिएको कालो बादलमा देखिएको चाँदीको घेरा जस्तै हो । महाधिवेशनअघि वैचारिक रुपमा काँग्रेसमा राजनीति हुने गर्छ भन्ने भावना जगाउने काम भिमबहादुर तामाङ नरहरि आचार्यको उम्मेदवारीले गरेको थियो । तर त्यो समुहले निर्वाचनमा साह्रै झिनो मत ल्यायो । नरहरि आचार्य जस्तो व्यक्तित्वलाई नपत्याउने काँग्रेसका कार्यकर्ता कस्ता होलान भन्ने सवैलाई लाग्यो थियो । गगन थापालाई उनीहरुले धेरै मत दिए । काँग्रेस कार्यकर्ता प्रति नकारात्मक धाराणा राख्नेहरु अब दुई प्रतिशत भए पनि कम भएका छन् ।
सभापतिमा बुढा कोइरला चुनिए । पदाधिकारीमा पुरनाकै बर्चस्व छ । यी सवै कुराले आशा राख्ने ठाउँ धेरै देखाउँदैन । तर देशको राजनीतिमा गन्हाएका गोविन्दराज, चिरििजंविहरुलाई प्रतिनिधिहरुले पाखा लगाए । राजनीतिलाई फोहर बनाएर त्यसमा खेल्न सिकेका खतरनाक खेलाडी खुमबहादुर खड्का तेस्रो स्थानमा नपरेको भए काँग्रेसका कार्यकर्तालाई सलाम गर्नेहरु अझै एक प्रतिशत बढ्ने सम्भावना थियो । तै पनि गन्हाएका बहुमत नेताहरु महाधिवेशनमा पछारिए यसले गर्दा काँग्रेस प्रतिको सहानुभुति केही जोगियो ।
पदाधिकारीमा चित्रलेखा यादवको जितले व्यक्तिगत रुपमा म औधि हसर्ित छु । यादव कोषध्यक्षमा विजयी भइन । शेरबहादुर देउवाले प्रतिनिधि सभा असमयमै विघटन गरेपछि सभामुख उपसभामुख रहे अरु सवै सकिए । सभामुख राजको पक्षमा लागे । जन आन्द्योलनको बलमा विघटित प्रतिनिधि सभा स्थापित भयो । पहिलो बैठक राख्दा तत्कालिन सभामुख तारानाथ रानाभाट किनारा लगाइए । चित्रलेखा यादवले त्यो ऐतिहासिक बैठक संचालन गरिन । त्यो बेलाको उनको बोली मेरो मन मस्तिष्कमा अझै गुजि रहन्छ । त्यो व्यक्तिको सम्मान काँग्रेसका मतदाताले गरे । काँग्रेसको महाधिवेशन राम्रो ठान्न मेरो मनलाई प्रेरित गर्नेमा चित्रलेखा यादवको जितको भुमिका ८० प्रतिशत छ । गगनको पहिलो स्थानले १९ प्रतिशत ठाउँ ओगटेको छ । नरहरी अचार्यले राम्रो मत ल्याएको भए चक्र बास्तोला सुप्रभा मध्ये कसैले जितेको भए चित्र लेखाको विजयी भुमिका ५० प्रतिशतमा खुम्चने थियो । खुमबहादुरको तेस्रो स्थान सहितको जितले खुम्चाएको मेरो मनलाई गोविन्दराज चिरिजंविको हारले केही फुकायॊ । तर समर्गमा काँग्रेस उस्तै छ। तर सवै रातको बिहानी अवश्य हुन्छ । काँग्रेस प्रति आशावादी बन्न सकिने सम्भावनाका कणहरु भने देखा परेका छन् ।