पाकेटमार चिन्ने काइदा

चोर हाम्रो प्रहरीभन्दा धेरै बाठो छ जस्तो लाग्छ हामीलाई । किन भने बाठो नभएको भए चोरेर टाप कस्न कसरी सक्थ्यो तर प्रहरी पनि चलाख नै रहेछ । किन भने चोरको पनि चण्डाल पाकेटमारको बोलि, बचन हर्कत सवै मेसो पाएछ नेपाल प्रहरीले । अनि प्रहरीलाई धन्यवाद दिनु पर्छ किन भने पाकेट मारका कोड भाषा र उसका हर्कत सवै सर्वसाधरणले थाहा पाउन भनेर पर्चा नै बनाएर छरेको छ चितवन प्रहरीले । यस कारण प्रहरी प्रति हामी आभारी छौं । दशैं तिहार जस्ता चाड पर्वहरु नजिक आउँदा पाकेटमार पनि चलायामान हुन्छन् । त्यसैले प्रहरीबट पाएको जानकारीले हामीलाई लुटिनबाट जोगाउन सक्छ ।
गाडीमा कसैले 'ऐ, यहाँ पैसा खसेछ" भन्ने कुरा गरेमा जान्नु रे त्यहाँ पाकेटमार पसेको छ । पैसा खसेको छ भन्ने कुरा गर्ना साथ मान्छेले पहिला आफ्नो पकेट र पैसा राखेको ठाउँ छाम्ने भयो । पैसा खसेको छ भनेर पाकेट मार्ने उद्देश्यले कराएको मान्छेले अरु मान्छेले कहाँ छाम्छन् त्यो हेरेर पैसा राखेको ठाउँ पत्ता लागउँछ र मेसो मिलाएर पैसा उछिट्याउँछ । प्रहरीले बाँडेको पहेलो पर्चामा यो कुरा उल्लेख छ । त्यसैले भिड भएको ठाउँमा बस्दा या बसमा यात्रा गर्दा कतैबाट पैसा खस्यो भन्ने आवाज आयो भने पैसा राखेको ठाउँमा आफ्नो हात त अवश्य नै जान्छ अनि त्यसपछि 'ओहो यहाँ पाकेटमार रहेछ" भन्ने ख्याल राखेर सचेत हुनु पर्ने भयो ।
प्रहरीको पहेलो पर्चाले अरु पनि धेरै कुरा भन्छ । जस्तै पाकेटमारले पाकेटमारलाई नै आफ्नो भाषामा केभन्दा हुन् ? उनीहरुले कोडभाषामा पाकेटमारलाई टिनुवा वा टिप्ली भन्दा रहेछन् । ध्रुब दाइ पैसा भएको मान्छे हो भन्ने उनीहरुको कोड भाषा रहेछ । गज भनेको हजार रुपैयाँको नोट आधा सेतो भनेको पाँच सय रुपैयाँको नोट र गज भनेको सय रुपैयाँको नोट हुँदो रहेछ पाकेटमारको कोड भाषामा । टिप्ली मास्टर भनेको पाकेटारको मेन मान्छे हुँदो रहेछ । प्रहरीलाई के भन्दा हुन भन्ने लाग्दो हो । थरि थरि सुरक्षाकर्मीका लागि फर फरक कोड भाषा रहेछ । प्रहरी भ्यानलाई भने पाकेटमारहरु कोडा भाषामा मानबेचे भन्दा रहेछन् ।
पोशाकमा रहेको प्रहरीलाई लाटा र सादा पोशाकको प्रहरीलाई पाकेटमारहरु ठुला भन्दा रहेछन् । केरकारको प्रहरीलाई डे भन्दा रहेछन् । नेपाली सेना र शसस्त्र प्रहरीलाई निलचरी भन्दा रहेछन् । लाहुरे भन्न माहुरे शब्द प्रयोग हुँदो रहेछ । माइली भनेको भारतीय रुपैयाँ होइछ । डलरलाई पाकेटारहरु ठुली भन्दा रहेछन् । कान र मसला भनेको मोवाइल रहेछ तान भनेको साथी होइछ । घोप्टे भनेको खुकुरी रहेछ पाकेटमार्दा छेकछाक गर्ने मान्छेलाई ढेक भन्दा रहेछन् उनीहरु । छुरी या चक्कुलाई चिसो भन्ने बानी रहेछ । दस्ती तोड भनेको रुपैयाँ निकाल भनेको होइछ । दह भनेर पनि यही कुरा संकेत गर्दा रहेछन् पाकेटमारहरु ।
चितवन प्रहरीले यो कोड भाषा पत्ता लगाउन निकै मेहनत गरेको देखिन्छ । मिहनेत गरेको बाहिर देखाउनु पनि पर्छ । त्यसैले पर्चा नै छापेर बाँडेको छ । अब समस्या कहाँ नेर आउँछ भने धेरै कोड शब्दहरु दैनिक कामकारवाहीमा बोलीमा आउने छन् । पाकेटमारले नभएर राम्रै मान्छेले ति शब्द बोल्यो भने बिचरा उसको राम धुलाई हुन बेर छैन । त्यसैले शब्द सुनेपछि पनि केही बेर बोल्नेको हर्कत बिचार गर्नै पर्छ है । नत्र बर्बाद होला । अनि पुलिसले पाकेटमारका कोड शब्द यसरी सार्वजनिक गरेपछि पाकेटमार कौन्सा हुस्सु हो र उनै शब्द बोल्दै बस्ने । उसले पनि कोड शब्द नयाँ जन्माउला नि । नयाँ शब्द नखोजे पाकेटमार लन्ठु, जन्माए हाम्रा प्रहरी हुस्सु । होइन र ?