क्यारेम बोर्डका गोटी

निकै पहिले भूपि शेरचनको एउटा कविता पढेको थिए त्यसको बारेमा धेरै कुरा याद नभए पनि आसय अझै दिमागबाट हटेको छैन । उनले क्यारेम बोर्डको गाटीसँग तुलना गरेर जस्ले जता हुत्यायो त्यतै मिल्कने मनुवाहरुलाई कटाक्ष गर्दै लेखेका थिए त्यो कविता । त्यस्ता दृश्यहरु हाम्रो समाजमा हराउन सकेका छैनन भूपि हराएको लामै समय भइ सकेको छ । अझ लामो समयसम्म नेपाली समाजमा कायमै रहने छ यो प्रचलन ।
मैले यो कुरा यहाँ किन गर्न लागेको हो भने केही दिन यता त्यस्ता दृश्यहरु देखिएका छन् यहाँ । पारस शाहको कुरा गरौं चितवनको जंगल भित्र रहेको टाइगर टप्स लजमा उनले गोली चलाए । नसाको सुरमा झगडा गर्दा गोली चलेको थियो । पारसले उपद्रो गरेकोमा कुनै शंका नै छैन । तर त्यो पनि देश भक्तिको गौरव पुर्ण कथा बन्यो हाम्रो नेपालमा । पारस समातिए चितवन प्रहरीमा ल्याइए ।
चितवन प्ररहीले तालिम केन्द्रमा राख्यो उनलाई । त्यहाँ पारस जिन्दावाद भन्ने नारा लगाउनेहरुको हुल आयो । त्यसमा युवाहरु पनि प्रशस्तै थिए । धेरै युवा यहाँ मात्रै होइन अरु ठाउँमा पनि नारा लगाए जस्तो लाग्दथ्यो । एक त नेपालमा भरखर भरखर गणतन्त्र आएको । युवाको जोशको भरमा नै हो गणतन्त्र आएको । त्यसैले पुर्व युवराज जो जाँड खाएर हल्ला गरेका कारण समातिएको त्यस्ताको पक्षमा नारा लगाउन युवाहरु आउलान भनेर सोच्न पनि सकिएन । तर युवा सकि्रयता पारसको पक्षमा पनि पाइयो ।
एकजना युवालाई मैले विषेश रुपमा ख्याल गरे । उनी निकै लागेका थिए पारसको पक्षमा भएको प्रदर्शनमा । बाहिरी व्यक्तित्व हेर्दा त्यस्ता आवारा र केही नबुझेका बेहोसी जस्ता पनि लाग्दैनन थिए । उनलाई पारस मन पारे होला मन पराउन पाइन्छ आए नारा लगाए भन्ने लागेको थियो । तर उनी पनि खेतला नै रहेछन् ।
पारस गएको लामै समय भयो । आज त उनको तारेख हो क्यारे । तर उनी नेपालमै छैनन् भन्ने जानकारीमा आएको छ । त्यसैले उनी आउँदैनन् पनि होला । पारस नआउँदै देउवा आए चितवन । देउवा पुस १५ गते आए । उनी भरतपुर विमान स्थलबाट बाइपास रोड हुँदै तीन खोले गुम्बा छिरे । बाइपास रोडमै छ तालिम केन्द्र जहाँ दुई रात पासरले बिताएर त्यही वाइपास रोड हुँदै जिल्ला प्रशासन गएका थिए ।
देउवा र पारसले प्रयोग गरेको बाटो मात्रै एउटै परेको होइन उनका अघिपछि लाग्ने धेरैको अनुहार पनि मिलेको थियो । त्यही काँग्रेस निर्णयक भइदिदा नेपालबाट राजतन्त्र गयो । त्यही काँग्रेसका कारण नै हो पारस समातिएका । तर पारसको पक्षमा नारा लगाउन आउनेहरु देउवा र काँग्रेस जिन्दावाद भन्न पनि आइभ्याएका छन् । यो त नपच्ने दृश्य नै हो । दुई हप्ता बित्न नपाउँदै मान्छेको मन यसरी केस्ले परिवर्तन गरायो । कति हलुका हो यो मान्छे । मैले पारसको पक्षमा नारा लगाउने सुकुमार युवकलाई देउवको पक्षमा पनि त्यसरी नै नारा लगाएको देखे । अव बिचारै गर्नु छ माओवादीका नेता प्रचण्ड आउँदा ति सुकुला सुकुमार अगाडी आउँछन् या आउँदैनन् । एमालेका नेता आउँदा देखिने पो हुन कि । आखिर यी क्यारेम बोर्डका गोटी होइनन् त स्टाइकरले जता हुत्यायो त्यतै मिल्कने । अनि त्यो स्टाइकर पनि अरु कसैको चाहनामा त नाचेको हुन्छ नि बोर्डमा ।