तिहारको तेल नसुक्दै गयो प्राण भाइको

तिहार भर्खरै सकिएको छ । २० दिन मात्रै भयो तिहार हामीबाट विदा भएको । तिहारका पाँच दिन हुन्छन् जसलाई यमपंचक भनिन्छ । यो बेलामा यमराज अर्थात काल पनि विदामा हुन्छन रे उनी बहिनी यमुनासँग बसेर टीका लगाउँछन् रे । भाइ टीका हुन्छ यमपंचकको अन्तिम दिन । दिदी बहिनीले दाजु भाइलाई निकै श्रद्धाले टीका लगाइ दिन्छन् त्यस दिन । चामलको भिजाएको पिठोको निधारमा ठाडो धसो्र बनाएर त्यसमा सप्तरंगी टीका अडाइ दिन्छन् दिदी बहिनीले । त्योभन्दा अघि पुजा गर्छन् । ओख्खर फुटाउँछन् । टीका लगाउन बसेका दाजुभाइलाई तेलको घेराले घेर्छन् । टीकापछि गलामा मखमली फूलको माला लगाइ दिन्छन् । दिदी बहिनीले बनाएको तेलेको घेरा नसुकुन्जेल, मखमली नओइलाउनजेल दाजुभाइलाई कालले लैजान सक्दैन भन्ने कथन तिहारसँग जोडिएको छ ।
यही आस्था र विश्वसाले पुर्वी चितवनको खैरहनीकी अप्सरा खरेलले पनि कात्तिक २१ गते दिउँसो भाइ कृण कँडेललाई टीका लगाइ दिएकी थिइन् । अप्सराका दाजु भाइ तीनजना हुन् तर दुईजना बेलायतमा छन् । अप्सरा सहित पाँच दिदी बहिनी मिलेर भाइ कृष्णलाई टीका लगाइ दिए । खाना खाएपछि कष्ण भैलो खेल्न भन्दै निस्किए । उनी त्यो रात घर फर्केनन् । भर्खर २१ लागेका कृष्ण रमाइलो गर्दै होलान भन्ने सोचे घरकाले । उनी आफन्तै पर्नेसँग निस्केका थिए घरबाट । कुनै अन्यथा सोचेनन् त्यस बेला । भोलि पल्ट बिहानै गाउँ नजिकको पम्पा खोलामा युवकको लाश भेटिएको हल्ला चल्यो । कृष्णको परिवारको मनमा चिसो पस्यो । कोही कृष्ण हो भन्छन् कोही होइन भन्छन् । मुख फिँजले छोपिएको थियो । त्यसैले झट्ट चिन्न सकेनन गाउँलेले । तर त्यो लाश कृष्णकै रहेछ ।
अघिल्लो दिन हालेको तेलको घेरो सुक्ने कुरै थिएन । गलाको मखमलीको महक अलिकती पनि घटेको थिएन । निधारमा सप्तरंगी अडाएको चामलको सेतो धसो्र राम्रोसँग सुक्न नपाउँदै कृष्ण यो संसारबाट सधैका लागि विदा भइसकेछन् । शरीरका विभिन्न ठाउँमा चोट थिए । कानमा नराम्रोसँग घाउ बनेको थियो । परिवारले त लाशै हेर्न सकेनन् । गाउँले पनि भक्कानिए । सवैलाई लाग्यो यो हत्या हो । अनि प्रहरीलाई हत्यारा समात्न आग्रह गरे । परिवार शोकमा छ । गाउँलेलाई उस्तै पिर परेको छ । प्रहरीले राम्रोसँग काम गर्ला भन्ने आशंका बढ्यो । प्रहरीले अनुसन्धान गरोस भन्ने उनीहरुले माग राखे । माग राखेपछि बाटो बन्द गर्नु नै पर्छ नेपालीलाई यो भने साह्रै नराम्रो चलन बस्यो नेपालमा । टीकाको भोलिपल्ट खैरहनीमा बिहानदेखि मध्यान्हसम्म चक्का जाम भयो । पुर्व पश्चिम राजमार्ग यसरी जाम हुँदा तिहारको बिदा सकाएर काममा फर्कन लागेकालाई कत्ति आपत परो होला यसको हेक्का कमैले राखे ।
बाटो बन्द भएपछि प्रहरी आयो सहमति गरो । अनुसन्धानका लागि चारजना उसै दिन समातिए । गहन अनुसन्धान गर्न भन्दै काठमाडौंबाट तालिम प्राप्त कुकुर मगाइयो । प्रहरीले काम गरेकै छ । तर गाउँलेहरुलाई अझै राम्रोसँग काम नहुने हो कि भन्ने गहिरो आशंका छ । पोष्टमार्टम रिपोर्ट गलत आएको छ रे भन्ने सूचना घरघरमा पुगेको छ यद्यपि त्यस रिपोर्टमा के छ त सत्य कुरा कसैलाई थाहा छैन । सामान्य मान्छेले पनि पोष्टमार्टम रिपोर्टको गज्जबसँग विश्लेषण गरेको देखिन्छ, सुनिन्छ । घटनाको सत्यतासम्म प्रहरी पुगोस भन्नका लागि गाउँलेहरु दवाव दिन छाडेका छैनन । हिजो मंसिर १० गते शुक्रबार चारस वस गाउँले जिल्ला प्रहरीमा आए धर्नामा बसे । प्रहरीले घटनाको सत्य पत्ता लगाएरै छाड्ने र दोषिहरुलाई कारवाही गरेरै देखाउने बचन दिएपछि उनीहरु फर्के । आश्वासन पाएर गाउँलेहरु फर्के तर जे भए पनि जसो भए पनि अप्सराले अब त्यो प्यरो कान्छो भाइ कहिल्यै पाउने छैनन् । जसले त्यो भाइलाई मारेको हो ति सवै समातिउन, जेलमा जाउन, उनको चाहना यही हो ।